Понеделник, 6ти август, 2018 година, ќе биде запишан како еден од најемотивните денови за сите фанови на Милан. 6ти август е денот кога Капитенот се врати дома! Паоло Малдини беше назначен за нов директор за Стратегија и Развој на спортскиот дел во клубот. Во таа чест, клубот организираше официјално претставување на новиот директор, каде покрај Малдини, беа присутни и спортскиот директор Леонардо и претседателот на клубот, Паоло Скарони. Во продолжение ќе ви пренесеме дел од прес-конференцијата, а целата можете да ја погледнете на тука.
СКАРОНИ
Претставува огромна радост фактот што Паоло Малдини е со нас, тој е навистина важна алка во враќањето на клубот онаму каде што припаѓа. Паоло Малдини ќе ја надгледува целата развојна стратегија, особено од спортскиот аспект. Малдини и Леонардо ќе бидат лицето на Милан низ целиот свет.
ЛЕОНАРДО
Паоло од секогаш сакаше да се врати, но работите не секогаш беа онака како што треба. Да се има Паоло во тимот значи многу, ќе ми биде од огромна помош во дневните активности, а и од личен аспект, тој секогаш ме импресионирал со својата доследност. Тој прифати поради условите кои се тука во клубот, но позади сево ова е нашето големо пријателство. Паоло Малдини е Милан. Ова е неговиот дом и тој ќе постави пример: во овој клуб, ние сакаме посветени и доверливи луѓе. Би сакал да потенцирам дека спортскиот дел ќе биде раководен од мене, Паоло и Гатузо и тоа е навистина одлично.
МАЛДИНИ
Јас никогаш не кажав ‘не’ на Милан. Сега, работите се поинакви, Леонардо и сопствениците ми го покажаа целиот проект и јас верувам во него. Јас сум навистина среќен. Леонардо беше клучен – луѓето ја прават целата разлика: ние сме пријатели, ние сме различни карактери но се надополнуваме еден со друг и го знаеме клубот. Се сретнав со сопствениците во Њујорк и се се случи навистина брзо: улогата која тие ми ја понудија беше клучна за донесување на мојата одлука.
Јас ќе работам со првиот тим и со младинските тимови. Ќе го раководам трансфер пазарот и односите со тренерот. Јас ќе го раководам целиот спортски дел заедно со Леонардо. Чувството за припадност е навистина важен сегмент и јас ќе се обидам тоа да го пренесам на играчите. Го чувствувам притисокот и одговорноста од улогата која ми е доделена, навистина е прекрасно што сум овде. На секој клуб му е потребен цврст и стабилен сопственик а овие сопственици се стабилни и имаат во план да го задржат клубот на средно-долг рок. Денес ја започнувам мојата менаџерска кариера и се надевам дека ќе постгнам одлични резултати. Да сакав, не можев да побарам подобри луѓе за соработка од овие што се покрај мене денес.
Разговарав со Гатузо кога беше во САД, ќе се сретнеме лице-в-лице многу брзо. Тој постигна солидни резултаи до сега и неговата тренерска позиција никогаш не беше под знак прашалник. Изминатите две сезони завршивме на 6 место и би сакале да го подобриме овој резултат, без премногу да потрошиме. Го доведовме Игуаин и Калдара, кој е навистина голем талент. Кутроне ме импресионираше изминатата сезона, тој до сега постигна фантастични работи. Донарума помина низ период исполнет со огромни притисоци, тој се справи со сето тоа многу добро и јас сакам да му помогнам. Мојот однос со фановите на Милан е фантастичен: јас ќе бидам оценет по мојата работа, исто како што бев оценет по моето издание на теренот, кога бев играч.
