Милан Фанс Македонија е еден од најстарите спортски фан клубови во Македонија, формиран во декември 2006. Во првите неколку години од постоењето, фан клубот функционираше на блог платформа, која редовно беше апдејтирана со нови содржини поврзани со Милан. Блогирањето како главен начин на онлајн комуникација во тој период, развиваше култура на дискутирање, споделување на информации од заеднички интерес и градеше поврзаност помеѓу десетината пасионирани росонери на блогот. Milan Fans MKD, како што беше именуван блогот, создаде и цврсти пријателства и другарување надвор од виртуелниот простор.

Со развојот на интернет комуникацијата, особено на социјалните мрежи, се јави потреба, но и желба од миграција и менување на навиките. Така, во Август 2012 беше промовирана Фесјбук страната Milan Fans MKD, подоцна Milan Fans Macedonia. Неспоредливо пошироките опции што ги понудија социјалните мрежи, значеја и поголема застапеност и видливост на активностите на фан клубот. Следењето на модерните трендови значеше проширување на Милан Фанс Македонија најпрво на Твитер, а потоа и на Инстаграм.

Летото 2017, после долги разговори и планирање Милан Фанс Македонија го направи веројатно најважниот чекор – официјализација на фан клубот под капата на Associazione Italiana Milan Clubs. AIMC претставува организација одговорна за координација на сите официјални фан клубови на Милан во светот. Со тоа, македонските росонери за првпат добија прилика да членуваат во официјален македонски фан клуб кој е мост меѓу сите вистински росонери и клубот.
Милан Фанс Македонија е регистрирано здружение и функционира како редовно правно лице, со свое седиште, сметка, статут, органи на управување и членство кое расте секојдневно. Мисијата на здружението е организација и унификација на сите навивачи на Милан во Македонија, додека дел од главните цели се: одржување на статусот на официјален фан клуб, дополнителна афирмација на Милан во Македонија, проширување на фан базата на клубот, како и организирање на настани, патувања и одржување на контакти со претставници на Милан.

Милан Фанс Македонија продолжува со истото темпо и денес, овозможувајќи им на нашите фанови незаборавно искуство на стадионите ширум Италија и Европа, како и во Скопје, на нашето збирно место во кафулето Play All Day на ул. Македонија.
Придружете ни се и вие на оваа неверојатна авантура, да создаваме спомени и историја заедно со нашиот Милан!