Интернационалната пауза е период кога тимовите одмараат и се подготвуваат за следните предизвици, со оние играчи кои им се на располагање. Управата на Милан, ги користи до максимум деновите помеѓу двата преодни рока, работејќи на нови засилувања. Последната информација поврзана со трансфери во Милан беше онаа за Лукас Пакета, бразилски интернационалец и член на Фламенго. Повеќе медиуми потврдија дека е постигнат договор помеѓу Милан и Фламенго, кој би требало да биде официјален на почетокот од преодниот рок во јануари.
По добивањето на наградата Нилс Лиедхолм за 2018 година, спортскиот директор на Милан, Леонардо, се обрати на медиумите, каде говореше за новото засилување Лукас Пакета, како и за можниот трансфер на Златан Ибрахимовиќ.
Леонардо при доделувањето на наградата Нилс Лиедхолм за 2018 година
Лукас Пакета? Нема многу што да се дискутира. Ние имаме генерален договор со Фламенго, но како што знаете, трансфер пазарот се отвара на 3 јануари. Имаме уште да договориме некои ситници пред трансферот да стане официјален. Сега треба да размислуваме само за лигата и Лига Европа, а не за трансфер пазарот. Каков играч е Лукас? Моментално тој е играч на Фламенго, има уште 10 натпревари во бразилското првенство, а неговиот тим се бори за титула. Ние треба да почекаме до 3ти јануари.
Лукас Пакета во прослава по постигнување на гол на натпреварот Фламенго-Индепендиенте на стадион Маракана, 13 декември 2017
Златан Ибрахимовиќ? Кога пристигнав во Милан ова лето, размислувавме за него, дури и на 37 години тој има големо влијание врз играта и врз соиграчите. Денес трансфер пазарот е затворен, а ние мора да ги донесуваме одлуките смирено. Не смее да заборавиме дека секоја наша одлука ќе биде базирана на Финансискиот Фер Плеј на УЕФА. Не смее да заборавиме од каде почнавме, пред 3 месеци не ни бевме дел од Лига Европа.
Златан Ибрахимовиќ во прослава по постигнување на гол на натпреварот ЛА Галакси-Чикаго на стадион Тојота Парк, 14 април 2018
Игуаин? Тој е стабилен и секогаш дава гол. Неговото доаѓање во Милан донесе важни впечатоци, тој е одличен во ‘влечење‘ на останатите. Имаме многу млади играчи кои се важни за овој тим. Биглиа се покажа како одлична референтна точка, Џек со своето искуство секогаш го дава својот максимум и постигнува голови.
Сусо и Гонзало Игуаин во прегратка по вториот гол на Игуаин на натпреварот Милан-Киево, 7 октомври 2018
Дерби дела Мадонина? Дербито е секогаш дерби… можеш да кажеш многу работи но кога судијата ќе го означи почетокот на натпреварот, започнува приказната. Ние растеме како тим, па тој меч ќе биде еден огромен тест за нас. Моето минато со Интер? Дербито е секогаш емотивно. Имам голема почит за Масимо Морати, имав одличен однос со него. Ме прави среќен фактот што сум назад во Милан.
