Милан го трампаа капитенот Бонучи за талентираниот Матиа Калдара и го донесоа Гонзало Игуаин на позајмица вредна 18м евра со право на откуп за сума од 36м евра. Игуаин, без размислување, е најквалитениот напаѓач кој Милан го имал, по продажбата на Златан Ибрахимовиќ во 2012 година. ‘Пипита’ заедно со Матиа Калдара, беа претставени како нови играчи на Милан и одржаа прес конференција на која одговараа на прашања на новинарите. Во продолжение, ви пренесуваме дел од прес конференцијата на новата 9ка на Милан, Гонзало Игуаин.
Што мислам дека можам да донесам во тимот? Пред се, би сакал да му се заблагодарам на клубот, да му се заблагодарам на Милан за напорот кој го вложија за да ме донесат тука. Проектот кој го имаат замислено навистина ме мотивира. Ова е навистина важен чекор во мојата кариера, се надевам дека ќе ја возвратам довербата која клубот вложи. Се приклучувам на клуб со огромна историја, а клубот, тимот и фановите заслужуваат да го видат Милан повторно во врвот на фудалот.
Гонзало Игуаин во музеот Мондо Милан во Каса Милан, 3ти август, 2018 година.
Колку важни беа Гатузо и Леонардо при одлуката за доаѓање во Милан? Се познавам со Леонардо од претходно, тој беше клучен за мојот трансфер, ме убеди со неговата искреност и самодоверба. Тоа беше еден од факторите кои беа клучни за мојата одлука да потпишам за Милан и јас сум многу благодарен на Леонардо и Елиот. Многу играчи пред мене се мачеле со бројот 9? Претставува гордост да се носи бројот 9, а јас сум среќен со оваа нова авантура. Сега треба да докажам дека направиле добар избор со мојот трансфер.
Матиа Калдара и Гонзало Игуаин со навивачите на плоштад Дуомо, 3ти август, 2018 година.
Дали Милан беа мојот прв избор земајќи го во предвид интересот на Сари и Челзи? Единствениот кој ме сакаше мене во Челзи беше Маурицио Сари. Јас имам голема почит кон Сари, но овде во Милан сите ме сакаа мене и тоа е најдоброто чувство што може да го почувствува еден играч. Се знам лично со многу играчи од овој тим, ќе се сретнам со Реина со кого играв заедно и тоа е уште една причина зашто го одбрав овој клуб. Биглиа? Тој ми е соиграч од репрезентацијата веќе 10 години, тој ми е пријател и многу го почитувам.
Лукас Биглиа и Гонзало Игуаин во Миланело, 3ти август, 2018 година.
Миланело? Миланело е тренинг центар кој до сега ми има оставено најголем впечаток, никогаш до сега немам видено вакво нешто. Опкружено е со зеленило, има фантастична историја и фантастични играчи кои поминале тука. Претставува дефиниција за фудбалот и се наежуваш со самото тоа што си тука. Миланело е навистина специјално место.
Гонзало Игуаин во Миланело, 3ти август, 2018 година.
Што мислам за моменталниот Милан? Мислам дека имаме одличен напад, играчите имаат карактеристики кои навистина ми се допаѓаат. Кутроне е млад играч но има огромна желба за напредок и тоа е уште една причина поради што се решив да дојдам тука – конкуренција за позицијата напаѓач во тимот. Дали сум ѕвезда на тимот? Не. Јас сум само играч кој клубот го довел за да му помогне да се врати назад онаму каде што припаѓа. Ѕвезда е целиот тим, а јас ќе дадам се од себе да му помогнам на овој тим да се развие, да расте и да напредува. Еден играч не го добива натпреварот, секој играч е важен, без разлика дали стартувал или влегол од клупата за резерви.
Гонзало Игуаин во Каса Милан, 3ти август, 2018 година.
Што разговаравме со Гатузо? Тоа што го разговаравме со Гатузо останува помеѓу нас, јас не сум таков тип на човек што сака да ги сподели тие работи со други. Кои се целите кои би ме задоволиле? На лично ниво, би сакал да го вратам Милан онаму каде што припаѓа, а за да го направам тоа морам да постигнувам голови. За да постигнувам голови, мора да имам самодоверба и да работам напорно, како и целиот тим, за да можеме да победуваме. Тоа е она на кое треба да се фокусираме, треба да веруваме во сопствените способности.
Гонзало Игуаин и Матиа Калдара на плоштад Дуомо, 3ти август, 2018 година.
