Италијанската фудбалска федерација во пресрет на новата сезона одлучи да го промени распоредот на натпреварите и во интерес на популарноста на лигата, да додаде коло помеѓу католичкиот Божиќ и Нова Година. Освен тоа коло, одлучи четвртфиналната фаза од Купот на Италија да ја смести веднаш пред и после Нова Година. Со оглед на тоа, момците на Гатузо немаа простор за одмор и веднаш после бламажата со Аталанта во саботата, почнаа припремите за Дербито против Интер во Купот. Пред денешната последна тренинг сесија, Милан ТВ направи кратко интервју со Џенаро Гатузо.
Гатузо е со став дека натпреварот со Интер би можел да ја промени сезоната. Еве како гледа на Дербито и на ситуацијата со тимот.
ЗА ДЕРБИТО
“Ќе биде многу тежок натпревар утревечер. Перишиќ и Кандрева знаат да бидат многу опасни. Интер доживеа 2 врзани порази откако немаа пораз по цели 16 кола. Ние исто така поминуваме низ исклучително тежок период и ни треба оваа победа утре.”
ЗА ПОДОБРУВАЊАТА ВО ТИМОТ
“На физички план, оваа екипа сеуште може и мора многу да се подобри. Би сакал да бидеме попрецизни. Имавме 53 шута на последните 2 натпревари, но не постигнавме гол. Имаме многу за работа за да се подобри овој аспект од играта. Можевте да видите дека на двата претходни натпревари со Верона и Аталанта, момците одиграа добро во почетните 20-25 минути. Но откако го примивме првиот гол, не реагиравме соодветно и ја изгубивме самодовербата. Сакам да видам напредок на мојот тим на тој план.”
ЗА ОДБРАНАТА
“Ова е првпат тим што јас го водам да брани човек-на-човек. Зборував со играчите и сфатив дека се чувствуаат покомотно и послободно кога бранат човек, место простор. Сите сме свесни дека тоа што не влече надолу не е квалитетот, туку психолошкиот аспект.”
ЗА КРИЗНИОТ ПЕРИОД
“Никој во, но и надвор од клубот не очекуваше ваков тежок период. Утрешниот натпревар може да ја промени сезоната и од психолошки аспект, но и во резултатска смисла.”
ЗА НАВИВАЧИТЕ
“Утревечер стадионот ќе биде полн. Навивачите многу ни помагаат, а ние не им возвраќаме соодветно. Наша должност е да одиграме натпревар кој ќе го врати ентузиазмот и насмевките на лицата на навивачите, како што тоа беше пред 3 месеци.”
110 ПРОЦЕНТИ
“Мора да покажеме огромна желба. Ова го кажувам по не знам кој пат. Секој еден од нас мора да даде буквално се за да го добиеме ова Дерби. Мора да ја донесеме победата утре! Тоа се очекува од нас и е наша должност, така што не смееме да направиме грешка сега.”
