По поразот од Арсенал во Лига Европа, лигата и купот се преостанатите обврски за Милан. По победата на Интер над Сампдорија, момците на Рино Гатузо знаеа дека победа над Киево на Сан Сиро е императив. Тоа и го сторија, со камбек во второто полувреме за победа од 3-2. По натпреварот, тренерот Гатузо даде интервју за неколку медиуми, па во продолжение ќе ви пренесеме дел од тие интервјуа.
Знаевме дека ќе биде тежок натпревар. На моменти бевме навистина спори, правевме грешки. Не треба да играме вака. Ја имавме топката во свој посед, но бевме многу спори. Се се заврши добро и сме среќни поради тоа. Сега треба да се одмориме и да си ја вратиме енергијата. Во моментов, не можеме да си дозволиме грешки. Ако сакаме да се бориме за место во Лигата на Шампионите, нерешените резултати не ни прават никаква услуга. Ние не сме брилијантни, но момците имаат голема желба за победа. Секој натпревар за нас е важен. ВАР системот? Без тоа, можеби и немаше да победиме.
Андре Силва? Тој сега ќе оди со националната селекција, како и многу други. Се надеваме дека ќе постигне гол и за Португалија. Тој мора да продолжи да работи напорно и да расте. Андре е голем професионалец, на моменти и премногу бидејќи понекогаш тренира премногу. Тој има огромен талент и голем простор за напредок.
Мусакио? Тој не беше баш среќен што го одбрав Запата, а не него. Но тој е вистински јужноамериканец и е еден од оние кои во соблекувалната се однесуваат како вистински лидери. Матео е тип на играч кој навистина ми се допаѓа, секогаш го кажува директно она што го мисли.
Калиниќ? (кој беше отсранет од тимот поради лошиот однос на тренингот во саботата) Утре е нов ден. Среќен сум кога ги гледам насмеани моите играчи, но на тренинг сакам да ги видам како работат напорно. Во спротивно, тоа за мене е непочитување. Немаше ништо посебно со Никола, како што знаете, јас бев прв кој го бранеше, но посветеноста е секогаш приоритет. Тие што не тренираат онака како што ќе кажам јас, нема да бидат повикани за натпревар и играчите го знаат ова. Единствениот проблем беше Никола, ако имаше повеќе такви играчи како него и тие ќе останеа дома.
Промашениот пенал на Кеси? Тој згреши при изведувањето на пеналот, но важната работа е дека Кеси игра со огромна желба, тој одигра добар меч не само на физички, туку и на технички план. Знаев дека ќе го промаши пеналот, зошо премногу долго размислуваше пред шутот.
Што им реков на играчите по завршувањето на натпреварот? Им кажав дека мора да мислат на одмор, да се одморат за паузата со своите семејства и девојки. Тие сите го даваат својот максимум. Жалам за она што се случи со Калиниќ. Но ова е фудбал и утре е нов ден. Нас ни е потребен Калиниќ во форма. Дали бев изненаден од тимот? Да, бидејќи одигравме добро и претпазливо.
