Спал – Милан: ново гостување за момците на Гатузо и нов натпревар со екипа која треба лесно да се добие. За среќа на навивачите на Милан, се помина глатко, со убедлива победа од 0-4!
Натпреварот започна со “blitzkrieg” гол на златното момче на Милан, Патрик Кутроне, кој пополека станува миленик на црвено-црната публика. Сусо центрираше од својата позиција, па по мешаницата пред голот и одбрана на голманот на Спал, Кутроне беше најумешен и реагираше брзо за огромна радост на навивачите на Милан, кои беа позиционирани баш позади голот на Спал. По голот, Милан намали со темпото и го успори натпреварот, па на полувреме се отиде со резултат од 0-1.
Во вториот дел, момците продолжија да притискаат и да бркаат нов гол за зацврстување на водството. Тоа и се случи,а во главна улога повторно беше Патрик Кутроне, кој во манир на легендарниот Пипо Инзаги, успеа повторно да го совлада голманот на Спал за 0-2. Исклучително значајниот гол за Милан донесе послободна и релаксирана игра. Една одлична реакција на Биглиа и одземена топка, му овозможи на аргентинецот да шутира и да го изненади голманот на Спал, постигнувајќи го својот првенец во дресот на Милан.
Гатузо направи низа измени, обидувајќи се да одмори дел од првотимците, па така во тимот влегоа Андре Силва, Монтоливо и Борини. Токму Монтоливо и Борини беа во главна улога на крајот на натпреварот, зголемувајќи го резултатот на одлични 0-4. Монтоливо одлично го проигра Борини, а италијанецот со одличен одмерен удар, ја смести топката во мрежата на СПАЛ.
Момците на Гатузо играат солидно во новата 2018 година и се се уште без пораз. Доаѓањето на Гатузо донесе стабилност и сигурност во тимот, влевајќи им ја на играчите таа толку посакувана самодоверба. Вреди да се напомене дека во последните 8 натпревари во кои Милан е непоразен, момците на Гатузо имаат примено само 4 гола, што говори многу за ефектот на Гатузо врз овој тим!
Оваа форма на Милан влева надеж кај фановите дека можеби тоа толку посакувано место за пласман во Лигата на Шампионите и не е така недостижно. Гатузо треба да продолжи со оваа стабилна и смирена игра, а резултатите сами ќе си дојдат. Следен противник е бугарскиот Лудогоретц во рамките на Лига Европа, каде Милан треба да покаже и докаже дека неговото место е во Европа!
