Карло Анчелоти во интервју за Radio Anch’io Sport денес зборуваше на неколку актуелни теми, од кои секако, за нас беше најинтересен неговиот став за состојбата во Милан. Освен тоа, со коментари и за отказот во Баерн, Серие А, неговата иднина…
“Причината за отказот во Баерн не беше повредата на Нојер. Тој е одличен голман и неговата повреда имаше ефект врз перформансот на целиот тим, но тоа не беше главната причина за отказот. Работам како менаџер веќе 20 години и ги познавам големите клубови. Знам дека тие секогаш бараат резултати, иако една сезона не може да се цени уште во Септември.
“Сега имам време да гледам повеќе фудбал и да барам нови прилики, но не веднаш. Мојот договор со Баерн завршува на крајот на сезоната и тогаш ќе почнам конкретно да разгледувам понуди. Би сакал сериозен проект, кој ќе ми даде сигурност и смиреност, иако добро знам дека никогаш не е лесно во оваа професија. Моментално само чекам и сигурен сум дека ќе се случи нешто.”
Анчелоти се осврна и на неговата иднина, односно на клубовите со кои медиумите го поврзуваа после отказот од Баерн.
“Премиер лигата е многу интересна, се разбира. Атмосферата е одлична во Англија, иако и за стадионите низ Германија важи истото. Не знам каде би можел да завршам следното лето, бидејќи и враќање во Италија е отворена опција. Секој ден се појавуваат нови шпекулација за моето следно работно место. Хрватска, Кина, Евертон, Челзи… Ве молам не го вознемирувајте мојот драг пријател Конте (низ смеа), јас секогаш сум во комуникација со него.”
“Серие А е исто така многу интересна. Наполи е лидер, но Јувентус никогаш не се откажал од титулата. Потоа го имате Лацио, Рома и Интер кој не игра во Европските купови. Милан направи многу промени ова лето, така што четвртото место би било одлична цел, но не и лесно остварлива. Никој нема магично стапче, за жал.”
“На проектите и самите менаџери им треба време за да испорачаат успех. Шест месеци не се доволни за се изгради една екипа од почеток. Милан треба да ангажира уште играчи во иднина. Монтела има право кога вели дека е тешко да се купат врвни играчи и затоа менаџментот на клубот одлучи да ангажира неколку млади талентирани играчи.”
“Се гледам себе како тренер на Рома, но не му кажувајте на Ди Франческо за оваа (низ смеа). Вистината е дека би се нафатил да го превземам било кој клуб каде што гледам сериозен проект и потенцијал. Ги чувам сите опции отворени и сигурно дека би ги разгледал сите понуди кои ќе пристигнат до крајот на оваа сезона.”
